查洛保雲證實骨折　或要抖2個月

韋斯咸今季黑仔到暈，上場聯賽慘吞利物浦5蛋外，王牌球星查洛保雲亦勇戰受傷，檢查後證實佢左腳出現骨折，或要長抖2個月，韋斯咸隨時要喺1月緊急增兵。

查洛保雲喺對利物浦一仗，被阿歷斯麥亞里士打踢傷後離場，佢周二(31日)喺社交網表示：「好不幸，我喺對利物浦上半場受傷，隻腳出現骨折，我如常戰鬥直到身體頂唔住。受傷係足球一部份，我期待盡早重返球場。」

據報查洛保雲養傷期為6個星期至8個星期，而球隊另一前鋒米查利安東尼奧之前上因嚴重車禍長抖，消息指「錘仔幫」會考慮喺1月轉會窗緊急增兵，解決前鋒人手短缺問題。