奧莫註冊失敗變自由身　冇得踢照效忠巴塞

西甲聯賽會證實，巴塞隆拿喺1月1日限期前未能成功為丹尼爾奧莫同保羅域陀重新註冊，意味兩人今季唔可以再為巴塞上陣，奧莫亦有權選擇自由身轉會。不過呢位西班牙國腳已表明，就算半年冇波踢，都會選擇繼續效忠巴塞。

巴塞因為財政問題，季前5,500萬歐元向RB萊比錫收購奧莫後，只能夠用傷病球員安達斯基斯坦臣嘅名額註冊到12月底，但下半季嘅註冊需要重新「撲水」，原本佢哋打算以1億歐元出售魯營球場VIP包廂，但最終都趕唔切喺限期前提交保證。西甲聯賽會聲明表示：「巴塞冇喺限期前提交符合財政規定嘅替補方案，未能符合球員註冊條件。」巴塞方面就轉向西班牙足總尋求協助，希望更改1個球員同一季唔可以喺同一球會註冊兩次嘅規定。

據報奧莫嘅合約中有條款列明，如果球員未能註冊，可以即時選擇自由轉會，而巴塞仍要支付轉會費同6年合約內所有人工。不過奧莫對巴塞有情有義，據報呢位攻擊中場決心留效巴塞，佢經理人巴拉表示：「奧莫嘅決定係留喺巴塞，佢希望為巴塞效力。」