施蒙尼打「人情牌」簽美斯　開出一項「超然條件」

根據西班牙《塞爾電台》爆料，美斯有望趁今個月冬季轉會市場開啟，重返西甲比賽，但並非重投巴塞隆拿，而係加盟馬德里體育會。據悉馬體會主帥施蒙尼打「人情牌」，以阿根廷同胞情誼邀請呢位37歲球王助陣，並開出「超然條件」，唔需要佢參與防守，可以享受快樂足球。

馬體會管理層已經接觸美斯嘅團隊，對方都有興趣促成今次轉會，呢支西甲勁旅希望簽入美斯，提升商業價值，呢位射手亦可以再戰歐洲高水平賽事，可以話係雙贏。馬體會教練施蒙尼親自承諾，只要美斯肯加盟，就給予「超然地位」，唔需要佢參與防守。

呢位54歲阿根廷名帥一向主張逼搶戰術，每位球員都要負責防守工作，佢卻願意畀美斯「豁免權」，足以證明極渴望簽入呢位同胞，甚至不惜放棄原則。

馬體會現時由「阿根廷幫」話事，除咗教練施蒙尼之外，隊內仲有6位阿根廷球員，包括有「美斯保鑣」之稱嘅迪保羅，美斯一旦加盟，可以快速適應。不過，美斯同國際邁亞密仲有1年合約，呢支美職球隊會否放人成為疑問。