拿達路重拾射門鞋　挑戰意超盃歷史金靴寶座

國際米蘭將於周五(3日)凌晨意超盃4強對阿特蘭大，隊長拿達路馬天尼斯除咗肩負入波爭勝重任之外，自己亦要力爭成為呢項賽事史上「射手王」。呢位27歲阿根廷國腳上場意甲重拾射門鞋，打破近2個月球會賽事入球荒，相信今場好大機會創造紀錄。

意超盃史上最多入波球員係保羅戴巴拿，上陣6次入4球，拿達路馬天尼斯同4位名宿迪比亞路、伊度奧、舒夫真高、泰維斯，以3球並列第2位。換言之，拿達路馬天尼斯今場只要入2球，就可以超越保羅戴巴拿，獨享意超盃歷史「射手王」殊榮。

值得一提，國米近4次對阿特蘭大，拿達路有3球進帳，屬於對方嘅剋星，今仗好大機會又有波入。

另外，根據《都靈體育報》爆料，國際米蘭已經同意今個月出售前鋒阿拿奧杜域，呢位35歲奧地利國腳今季各項賽事上陣10場入2球，拖連奴有意簽入佢。