卡斯米路同意1月離隊　轉會費超平

根據巴西媒體《UOL》爆料，曼聯中場卡斯米路已同意離隊，希望爭取1月轉會市場重開，立即走人，紅魔鬼為促成交易，送走呢位高薪球員，只要求1,500萬鎊(約1.46億港元)轉會費，沙特阿拉伯豪門艾納斯最大機會簽入呢位32歲巴西老將。

卡斯米路近年狀態走下坡，早於開季前已多次傳出曼聯計劃出售佢，但未能成事，紅魔鬼上場英超對紐卡素，曼紐爾烏加迪停賽，卡斯米路獲得正選上陣，但表現一無是處，甚至同隊友哈利馬古尼發生爭吵，佢亦感到留隊非常無癮，決定提早走人。

卡斯米路仲有1年半合約，曼聯新股東拉特克利夫正在積極削減球會支出，樂意放走呢位周薪高達35萬鎊嘅「高薪低能」球員，不惜以低價1,500萬鎊出售佢，盛傳艾納斯有意簽入卡斯米路，如果成事，佢可望同C朗再次合作。