放心晒！超級電腦指曼聯降班機會僅0.15%

曼聯今季成績低處未算低，上年10月炒坦哈格後以為可以重新振作，點知魯賓艾摩廉接手後「衰多兩錢」，近6場聯賽5敗後捲入降班漩渦。不過據Opta嘅超級電腦計算，曼聯今季降班機率只得0.15%，球迷當堂放心晒！

權威數據公司Opta近日用超級電腦為英超進行預測，經過10,000次模擬賽季後，只有15次出現「曼聯降班」嘅結果，機率僅0.15%。模擬嘅數據包含球會嘅往績、狀態、實力、對手、賽程等因素，盡量還原真實客觀環境，而另一老牌球會韋斯咸，今季降班機率亦只有0.82%。

曼聯依家有22分排第14位，距離降班區有7分差距，而修咸頓、李斯特城同葉士域治等降班熱門實力較弱，要曼聯降班確實係「匪夷所思」，不過領隊魯賓艾摩廉都唔敢否認降班可能：「係有呢個可能，我哋要同球迷老實，依家係曼聯歷史上其中一個最困難時刻。」