同恩師重逢？祖雲達斯提出借用舒克斯

荷蘭前鋒約舒亞舒克斯季前加盟曼聯後，球場上表現一落千丈，上場對紐卡素只係踢33分鐘就被換出，自家球迷柴台令呢位小將眼泛淚光。據意大利傳媒報道，祖雲達斯已決定今個月向佢招手，舒克斯有望重投「恩師」莫達懷抱。

舒克斯喺魯賓艾摩廉手下未獲重用，不過喺意甲就有唔少「粉絲」，上季喺博洛尼亞教到舒克斯「曉飛」嘅教練莫達，今季執教祖雲達斯後仍對佢念念不忘。意大利《共和報》同《都靈體育報》都指出，祖雲達斯幾乎肯定會喺今個月提出斟介。

曼聯上年用4,250萬歐元向博洛尼亞收購舒克斯，但祖記未能負擔高昂轉會費，預計會以「先借後買」方式斟介，曼聯亦唔介意畀舒克斯離隊，如果佢跟返莫達後重生，對舒克斯嘅轉會價值亦有利無害。莫達上季曾大讚舒克斯係「新朗拿甸奴」，或者真係可以幫舒克斯重振雄風。