干斯卡奧AC米蘭首演即「打仔」

AC米蘭日前聘請沙治奧干斯卡奧執教，呢位葡萄牙教練首演，就要喺意超盃大戰祖雲達斯，更有意思嘅係，沙治奧個仔法蘭斯高干斯卡奧就係祖記主力，沙治奧賽前講明冇面畀，要「打仔」立威！

沙治奧喺執教波圖嗰陣，一手提攜22歲嘅法蘭斯高上位，仲幫佢入埋葡萄牙國家隊。沙治奧上年夏天離開波圖，法蘭斯高亦以借用身份轉投祖雲達斯，喺意甲表現出色並成為球隊主力之一。

今次沙治奧接掌AC米蘭帥印，首演就係父子對決，沙治奧表示：「我有5個仔，我同佢哋每日都傾偈。喺屋企，法蘭斯高係我嘅仔，不過職業上佢就係我嘅對手，分得好清楚。」

意甲專家柏度雲喺賽前分析表示：「好有趣，沙治奧一手訓練法蘭斯高成為球員，佢完全知道個仔有咩優勢同弱點，呢個會係AC米蘭今場一大優勢。」