拉舒福特3條出路已斷　兩大豪門最後爭逐

曼聯前鋒拉舒福特嘅去向，將成冬季轉會窗嘅焦點，據報「福仔」近日已拒絕3間沙特豪門嘅豐厚聘約，而英超同土超兩條出路亦被「斬斷」，有消息指巴黎聖日耳門同多蒙特會展開最後爭奪。

英國《每日郵報》報道，拉舒福特收到沙特3間球會開出3,500萬鎊天價年薪，不過佢目標係重返英格蘭國家隊，覺得去沙特踢波會影響入選機會，所以已經作出拒絕。

同樣道理，雖然有傳加拉塔沙雷、費倫巴治等土超球會對佢有興趣，但「福仔」唔想去土耳其呢類次級聯賽，目前同樣唔會考慮，而曼聯亦唔會賣佢去其他英超球會，意味阿仙奴、紐卡素等都冇行。

據《TeamTalk》消息，拉舒福特「長期擁躉」巴黎聖日耳門將會提出斟介，而德甲多蒙特亦加入戰團，佢哋上季向曼聯借用查頓辛祖效果理想，而且近年唔少英格蘭球員喺多蒙特都有良好發展，或成為「福仔」最佳出路。