曼城急救防線　將補充兩位後衞

曼城今季成績大倒退，防線成為致命傷，踢19場英超聯已失26球，仲多過護級球隊愛華頓，根據「轉會權威」記者羅曼諾(Fabrizio Romano)爆料，「藍月亮」計劃今個月收購朗斯中堅卡胡辛洛夫，堵塞防線漏洞。

現年20歲嘅卡胡辛洛夫2023年7月加盟朗斯，成為法甲史上首位烏茲別克球員，今季擔任主力，上陣16場並有1球進帳，早已獲得熱刺、紐卡素、巴黎聖日耳門、馬賽等大球會垂青，曼城現時亦加入爭奪，估計卡胡辛洛夫身價為2,000萬歐元(約1.65億港元)，呢個數字對於「藍月亮」而言，只係濕濕碎，有望將佢收歸旗下。

除咗卡胡辛洛夫之外，曼城將會提早向賓菲加收回右後衞伊沙卡保尼，呢位23歲布基納法索國腳上年夏天被外借去賓菲加，為期1季，但不獲重用，僅於葡超上陣3次，達唔到練兵效果，加上曼城急需要補充防線球員，寧願提早收回佢自用。