如果曼聯降班　將損失87億贊助商合約

曼聯開始要打護級戰，如果降班不但係球壇大災難，對曼聯本身嘅損害更係無法估計，據報單計佢哋同adidas嘅贊助合約，總值高達9億鎊（約87億港元），如果球隊降班，贊助合約就會被終止。

曼聯2023年同上述贊助商更新合約，年期至2035年，每年贊助金額9,000萬鎊，如果今季降班，贊助商可以將贊助金額減半至4,500萬鎊，並可以在一個完整球季前通知終止合約。

其實曼聯嚟緊肯定會被贊助商扣錢，因為假如來季失落歐聯資格，就會扣減贊助費1,000萬鎊，而從任何角度睇，曼聯今季都冇乜可能取得來季歐聯席位。

曼聯在去年財政報告曾指出：「英超表現直接影響球會業務，成績差可能對球會經營、財務狀況同現金流產生不利影響，包括產品銷售、版權、門票收入將大幅下降。」

「如果成績連續幾季持續向下，可能對球會吸引或留住優秀球員及教練團隊，以及支持者、贊助商及其他商業合作夥伴產生負面影響。」