PSG向沙拿開3年合約　周薪400萬

利物浦埃及王牌射手穆罕默德沙拿至今仍未續約，雖然沙拿本人傾向留隊，但由於佢依家可以同海外球會傾轉會，故此引來歐洲豪門關注，據報巴黎聖日耳門係最積極一隊，PSG願意開出3年合約，周薪高達50萬歐元(約400萬港元)嘅優厚條件，利誘沙拿來投。

其實PSG開出嘅薪酬唔算高，沙拿喺利物浦周薪就高達35萬鎊頂薪，如果沙拿貪錢，沙特阿拉伯兩年前曾開出周薪500萬鎊天價，沙拿已經去咗中東。

PSG同利物浦所開嘅條件最大分別，就係合約年期，PSG願意開3年約，對沙拿有一定吸引力，至於利物浦對於年屆32歲嘅沙拿有顧忌，雙方一直未傾妥合約年期。

分析指，PSG向沙拿開出條件，雖然沙拿未必答應，但已令沙拿向利物浦爭取續約處於有利位置，利物浦必須考慮放寛條件，加快同沙拿續約進程，以免球員自由轉會，人財兩失。