網民驚呼　艾摩廉1個多月蒼老20年

上月接任曼聯帥印嘅39歲少帥魯賓艾摩廉，上任初期笑容滿面，躊躇滿志，充滿陽光氣息，準備喺奧脫福幹一番事業，1個多月過後，艾摩廉成個人落晒形，眉頭深鎖，面色鐵青，有網友驚呼：個幾月蒼老20年！

回看艾摩廉呢個多月經歷，首場賽和葉士域治，初來埗到尚算合格，接着迎來蜜月期歐霸聯賽2連勝，不過蜜月期好快完，對阿仙奴同森林2連敗失6分，雖然之後歐霸同對曼城2連勝有所反彈，但只係更大跌浪嘅迴光反照，近期球隊4連敗，英聯盃出局，聯賽跌至史上最低嘅14位，開始要為護級打算。

艾摩廉前路崎嶇，即將面臨嘅挑戰將會更加嚴峻，聯賽對利物浦，之後英足盃對阿仙奴，跟住係對修咸頓嘅「護級大戰」，若然3場輸晒，艾摩廉將會更加面無血色。