拉舒福特「被生病」無緣雙紅會　用一行動反駁艾摩廉

曼聯將於周一(6日)凌晨英超「雙紅會」作客利物浦，紅魔鬼領隊魯賓艾摩廉透露，前鋒拉舒福特因為病咗，近日缺席操練，無法參加今場大戰。不過，「福仔」卻喺社交網上載自己現身訓練基地相片，暗示艾摩廉講大話，令兩人關係進一步惡化。

魯賓艾摩廉出席記者會期間話：「好不幸拉舒福特病咗，唔可以參加訓練，我認為佢未能出戰今輪英超。」至於被問到拉舒福特是否會離隊，艾摩廉指佢處境並冇改變，同其他球員一樣，仲話呢位27歲英格蘭國腳幾時上陣，要根據佢表現而定。

不過，魯賓艾摩廉講完之後幾個鐘，拉舒福特喺社交網上載自己身處訓練基地相片，滿臉笑容，完全唔似有病，令人懷疑艾摩廉故意雪藏佢。事實上，由上月對曼城開始，拉舒福特一度連續4場被踢出大軍名單，直至上場對紐卡素，先至重返後備席，但並冇上陣，今場又無緣對利物浦，預料佢今個月離隊機會愈來愈大。