狼隊班救兵　3倍人工撬法甲鐵衞

英超榜尾形勢混亂，除咗曼聯要開始準備護級，排尾4嘅狼隊更係水浸眼眉，據報佢哋換帥後有起色，決定喺冬季轉會窗再班救兵，準備以重金2,000萬歐元（1.6億港元）向法甲蘭斯報價，希望羅致該隊27歲中堅艾巴度，並向球員開出3倍人工。

狼隊改由新帥域陀佩利拉後，成績即時反彈，近3場2勝1和，暫時以1分壓住葉士域治排尾4嘅17位，既然護級有希望，會方決定再出重本增兵，睇中蘭斯後衞艾巴度，蘭斯初時唔想放人，但狼隊開出2,000萬歐元報價，蘭斯終於改口。

科特迪瓦國腳艾巴度現時在蘭斯嘅月薪係7.5萬歐元，狼隊開出6萬歐元周薪個人條件，即月薪超過24萬歐元，係佢現時3倍，艾巴度當然唔會拒絕。

蘭斯2022年簽入艾巴度，只係使咗260萬歐元，佢現時身價估計值1,000萬歐元，狼用雙倍價錢報價，如無意外好快成事。