球迷抗議麥巴比：卡昂唔係你嘅玩具

新一年法乙卡昂主場0比1不敵克萊蒙特，各項賽事4連敗，並跌至16位捲入護級漩渦，現場有球迷拉橫額，向班主基利安麥巴比抗議，表示「卡昂唔係你嘅玩具」，亦有球迷組織發起萬人聯署，向「麥總」表達不滿。

今次抗議事件，要講番去年夏天，麥巴比以1,500萬歐元(約1.2億港元)收購卡昂8成股權，成為卡昂班主，不過卡昂今季表現急跌，又上季排第6，跌到今季要護級，上半季17場只得15分排16位，被捲入降班漩渦。

對排4尾克萊蒙特嘅護級大戰，超過15,000名球迷入場向「麥總」拉橫額抗議，橫額上面寫住「麥巴比，卡昂唔係你嘅玩具！當你在世界舞台閃耀時，請尊重本土傳奇！」其後再有萬人聯署，向麥巴比抗議。

球迷除咗不滿麥巴比入主後成績下滑，去年底會方辭退球隊傳奇主帥尼古拉斯紹貝，亦係主因，原來紹貝在卡昂效力長達17年，掛靴後在卡昂擔任青訓教練至主教練，深受球迷愛戴，但卡昂去年12月29日向佢派大信封，結果惹起眾怒。