聖人吞5蛋！岩士唐尷尬頒獎「中波膽」球迷

修咸頓周六(4日)英超主場慘吞賓福特5蛋，20場聯賽只得6分排包尾，降班機會極大。修咸頓喺主場慘敗已經冇晒面，一名「大媽」球迷仲要成功估中波膽，要勞煩啱啱輸完波嘅阿當岩士唐負責頒獎，場面真係超尷尬。

修咸頓大敗後沉淪包尾，20輪6分嘅成績，追平新特蘭05/06球季嘅英超史上頭20輪最低分紀錄，領隊祖歷賽後表示：「踢得好差，冇嘢好講，球員心情好低落，但呢個時候更加要團結，我哋要明白依家嘅處境，希望下場踢好啲。」

賽後喺修咸頓主場包廂，有戴住修咸頓頸巾嘅「大媽」，好有眼光咁估中修咸頓輸0比5波膽，獲贈修咸頓波衫一件，有份落場嘅阿當岩士唐就黑晒面咁頒獎，雖然現場一片噓聲，但個「大媽」就鬼死咁開心，相當搞笑。原來個「大媽」係一位修咸頓球迷媽媽，本身完全唔識足球，今場係第1次跟個仔去包廂睇波，結果「不幸」貼中呢個悲慘賽果。