阿仙奴冇運行！「最後希望」尼華尼利都傷埋

阿仙奴喺英超被白禮頓逼和，爭標形勢陷入絕境，本來被視為「最後希望」嘅17歲新星尼華尼利，今仗入波後亦宣告受傷，「兵工廠」鋒線人腳捉襟見肘。

喺布卡約沙卡同史達寧齊齊養傷下，尼華尼利近期擔正右翼表現出色，今場作客白禮頓先開紀錄，係呢位17歲小將今季第5個入波，亦係英超第2個入球。

Opta數據顯示，尼華尼利係阿仙奴史上首個未夠18歲，就喺英超入超過1球球員，環顧成個英超，亦只有朗尼、奧雲、卡丹馬達利、占士米拿同馬捷達能夠18歲生日前入2球或以上，尼華尼利係史上第6人。

不過尼華尼利半場被換走，領隊阿迪達賽後表示：「真係好壞嘅消息，我哋又失去尼華尼利，佢嘅肌肉出現問題，半場一定要換走佢。」