傳馬斯克580億收購利物浦　3大猛將等收肥約

根據英國媒體《Weekend Sport》爆料，世界首富馬斯克計劃斥資60億鎊(約580億港元)收購利物浦，如果成事，紅軍就有大把資金，可以向3位將於今夏約滿嘅主力穆罕默德沙拿、阿歷山大阿諾特、華基爾雲迪積克開出肥約綁實佢哋，仲有望大肆增兵，進一步提升實力。

利物浦2007年落入2位美國商人吉列、希斯手上，3年後以3億鎊轉售畀美國財團芬威體育集團，球隊近年獲得佳績，包括贏得歐聯冠軍同首奪英超冠軍，但芬威體育集團喺轉會市場投資偏低，令利物浦球迷非常不滿，2年前傳出芬威有意賣盤，今次爆出同屬美國富商嘅馬斯克有意接手，絕對唔出奇。

事實上，馬斯克已經唔係第一次同英超球會扯上關係，佢曾於2022年8月喺社交網發文，揚言「正在收購曼聯」，令到全球紅魔鬼球迷非常雀躍，點知呢位美國特斯拉汽車創辦人兼行政總裁，轉個頭又澄清，話自己只係講笑，並且唔會收購任何球隊，令曼迷空歡喜一場。至於馬斯克今次會否真係入主利物浦，大家拭目以待。