沙拿最愛屠「魔」　一項數據令曼聯顫抖

利物浦即將於周一(6日)凌晨零時30分英超主場對曼聯，前鋒穆罕默德沙拿又準備大開殺戒，翻查數據，呢位埃及國腳專剋曼聯，至今16次鬥紅魔鬼，射入15球及6次助攻，係佢職業生涯入波最多嘅對手，今場好大機會再數胡。

穆罕默德沙拿對住英超「Big 6」都有入波及助攻，當中21次遇上熱刺，射入14球及4次助攻，22次鬥曼城，累計入12球及7次助攻，至於17次迎戰阿仙奴，攻入11球及2次助攻，另外23次對車路士，有8球進帳及4次助攻。

曼聯成為沙拿腳下最大苦主，曾經被呢位32歲球星15次攻破大門，單計沙拿近8次英超對紅魔鬼，就入咗7球及4次助攻。沙拿現時以17個入波及13次助攻，佔據今季英超射手榜及助攻榜第1位，狀態大勇，今仗勢必成為曼聯防線嘅噩夢。