利物浦終於出手　30萬鎊周薪合約留阿諾特

利物浦3大主力穆罕默德沙拿、華基爾雲迪積克同阿歷山大阿諾特季尾約滿，續約問題受到球迷密切關注。近日盛傳皇家馬德里高薪利誘阿諾特加盟，消息成功逼到利物浦「做嘢」，據報球會已向阿諾特開出一份30萬鎊周薪新約，正等待該英格蘭國腳做決定。

據英國《每日鏡報》報道，利物浦已向阿諾特開出5年新約，總值高達7,800萬鎊，30萬鎊周薪亦同皇馬開出嘅合約睇齊。雖然消息指皇馬將另外再畀1億鎊嘅簽字費，不過如果阿諾特留效利物浦，將會喺華基爾雲迪積克離開後，成為「紅軍」下任隊長，要名定要利，就睇阿諾特點揀。

皇馬對阿諾特志在必得，據報佢哋唔單止會等到呢位右閘夏天回復自由身，更加想喺今個月就完成收購，早前開價2,000萬鎊收購，但被利物浦一口拒絕。