科芬拿不滿「被收咧」　公開質疑馬利斯卡

車路士近期成績下滑，內部似乎亦出現問題，領隊馬利斯卡早前宣布，中堅韋斯利科芬拿受傷可能提早收咧，不過該法國球星就喺社交網反駁，表明「唔知點解馬利斯卡咁講」，令球迷擔心將帥關係出現裂痕。

科芬拿喺上月對阿士東維拉大腿肌肉受傷，馬利斯卡最初話要抖3至5個星期，不過日前佢再透露傷勢再出問題，今季可能會提早收咧。勢估唔到，科芬拿就喺社交網高調反駁：「唔係真嘅！我並冇提早收咧，我唔知點解馬利斯卡咁講，我會喺4至6個星期後返嚟。」

據法國《隊報》爆料，問題出於雙方對治療方案嘅意見分歧，車路士軍醫建議佢開刀徹底根治，而做手術後休養期至少要3個月，不過科芬拿嘅團隊就拒絕做手術，希望可以等佢自己好番。