告別戰！杜巴夫卡砌完阿仙奴去沙特

紐卡素門將杜巴夫卡喺英超打滾7年，周三(8日)凌晨英聯盃作客阿仙奴將會上演「告別戰」，據報佢已經同沙特豪門艾沙比達成轉會協議，砌完阿仙奴就會飛去沙特做體測。

35歲嘅杜巴夫卡季尾回復自由身，紐卡素亦無意同佢續約，不過今季喺尼克普比受傷下，呢位斯洛伐克門神仍有唔少上陣機會，各項賽事7次上陣全勝，當中5場保持不失球。

不過尼克普比即將復出，紐卡素亦決定把握最後機會「套現」，據報接納艾沙比800萬鎊收購價，所有細節都傾掂晒，但紐卡素就要求畀佢踢埋英聯盃4強首回合，完場後先飛去沙特完成轉會手續。

紐卡素領隊艾迪侯域亦間接證實杜巴夫卡會離隊：「我哋想杜巴夫卡留低，但亦要尊重球員自己意願，加上佢合約就嚟完結，好多決定唔係咁簡單。」