哥列迪巴「官宣」簽尼馬　實情係......

巴西球壇日前掀起一陣哄動，巴乙球會哥列迪巴上周六(4日)喺官方網頁宣布，尼馬喺夏天約滿希拉爾後會以自由身加盟。正當粉絲興奮慶祝，先發覺原來係被黑客入侵，結果一場歡喜一場空。

哥列迪巴嘅「假官宣」非常認真，有埋會長加比爾利馬講斟介嘅難度，以及對尼馬嘅表揚，但呢段熱爆官宣幾個鐘頭後，突然變成一句「哥列迪巴永遠踢巴乙」嘅挑釁說話，隨時網頁更癱瘓。

哥列迪巴證實官網被黑客入侵，經搶救後已經回復正常，而且從黑客嘅技術判斷，好可能係上年5月，入侵富明尼斯官網，無厘頭宣布成功簽入艾寧夏蘭特嘅同一班人。

巴西前鋒尼馬同希拉爾合約去到夏天完結，消息指尼馬好可能會等到約滿先離開，而最大機會加盟嘅係前球會山度士。