法比加斯又睇中自己友　科木斟馬迪

鍾意簽過氣球星嘅科木又有新目標，今次睇中里昂36歲中場尼曼查馬迪，佢同科木主帥法比加斯更係舊隊友，相信一旦加盟，合作不成問題。

尼曼查馬迪踢過車路士同曼聯，轉戰法甲前曾喺羅馬效力，對意甲唔陌生，同主教練法比加斯更係老相識，兩人曾喺2014至17年在車路士做過隊友，一齊幫「藍戰士」贏過2次英超冠軍。

36歲嘅馬迪今季先加盟里昂，係隊中主力，上陣18場當中，有15場正選上陣，球隊現時排法甲第5，佢出咗唔少力，現時身價估計為250萬歐元(約2,000萬港元)。

科木現時排16位，有降班危機，不過簽老牌球星方針未變，曾先後簽入華拉尼、連拿、沙治羅拔圖同艾拔圖摩蘭奴等名將，雖然未必幫到球隊太多，華拉尼更已掛靴，但噱頭十足。