杜辛華荷域明年約滿　PSG阿仙奴齊探盤

3年前冬季轉會窗「標王」杜辛華荷域，轉眼間已經效力祖雲達斯3個球季，佢合約將於明年夏天完結，因此呢位塞爾維亞射手今個冬窗吸引多間豪門關注，其中巴黎聖日耳門將於短期內報價，而阿仙奴亦進行查詢。

杜辛華荷域2022年1月由費倫天拿轉投祖雲達斯，轉會費7,000萬歐元成為當時冬窗最高身價轉會球員，3季上陣124場攻入53球，贏得1次意大利盃，今季持續有好表現，至今攻入12球2助攻，距離約滿尚餘年半，因此成為轉會市場搶手貨。

呢位24歲射手係阿仙奴長期目標之一，今個冬窗「槍手」亦進行查詢，以決定是否正式報價，巴黎聖日耳門總監金波斯認為杜辛華荷域係適合主帥安歷基體系嘅9號球員，因此將會提出報價，與祖雲達斯展開交易談判。