熱刺簽入「新施治」　英聯盃鬥利物浦首演

熱刺近期出現「龍門荒」，不過周四(9日)凌晨英聯盃對利物浦前有救兵，新加盟嘅捷克門將堅斯基已獲發工作證，呢位「新施治」有望即刻為球隊把關。

熱刺1號門將古里莫維卡里奧重傷長抖，副選費沙科士打近日因病缺陣，球隊日前用1,600萬歐元，成功收購布拉格斯拉維亞21歲門將堅斯基，據報周二(7日)成功獲發工作證，可以趕及英聯盃上陣。

將會着31號嘅堅斯基表示：「熱刺係世界名牌，喺捷克都好受歡迎，能夠去英超係所有球員嘅夢想，對我嚟講係一個新體驗，好榮幸能夠簽約熱刺，非常期待。」

堅斯基喺捷克被譽為「新施治」，佢今季為布拉格斯拉維亞上陣29場，有14場賽事保持不失，呢位小將同熱刺簽約到2031年。