沙拿「無聲抗議」　一幅圖引爆球迷爭議

利物浦今季向各大錦標進發，不過3大主力續約風波似乎未有完結迹象，近期不斷用「小動作」向球會施壓嘅穆罕默德沙拿，日前突然喺社交網貼出佢同阿歷山大阿諾特、華基爾雲迪積克同框相片，但並冇加上任何說明，明眼人都知沙拿係做緊「無聲抗議」。

利物浦對曼聯一仗，有球迷喺晏菲路高舉橫額，要求利物浦盡快同「3子」續約，而沙拿賽後就喺社交網貼出比賽入面，佢同阿諾特準備處理死球嘅相片，兩人身後就係雲迪積克，相片「成功」勾起利物浦球迷心中怨恨，紛紛留言表態叫利物浦盡快「科水」續約。

不過，沙拿再搞「小動作」就引嚟名宿加歷查批評：「喺續約問題上，雲迪積克真係處理得最好，用球場上表現去說話，盡晒隊長嘅責任。講沙拿同阿諾特之前，應該先表揚雲迪積克，我覺得佢兩個應要以雲迪積克為榜樣。」

面對加歷查嘅批評，沙拿亦留言反擊：「我開始覺得你(加歷查)好迷戀我！」意思係諷刺加歷查經常對沙拿續約問題說三道四。