安東尼或轉戰希臘　重遇馬迪爾

曼聯翼鋒安東尼馬菲奧斯已經淪為「冗員」，可能今個月被外借或者出售，根據英國《天空體育》爆料，希臘球隊奧林比亞高斯有意借用呢位24歲巴西國腳，如果成事，安東尼馬菲奧斯就可以喺希臘聯賽，遇上現時效力AEK雅典嘅前曼聯隊友安東尼馬迪爾。

據悉曼聯會方四出聯絡各地球會接收安東尼馬菲奧斯，此前傳出西甲球隊貝迪斯有興趣簽入佢，現時奧林比亞高斯加入爭奪，因為呢支上屆歐協聯冠軍早前同巴西老將韋利安解約之後，需要簽入翼鋒填補空缺，並睇中安東尼。

雖然安東尼成「魔」後表現欠佳，但佢效力阿積士期間上陣82場入24球及22次助攻，可見佢踢歐洲二三線聯賽，有不俗發揮。不過，安東尼馬菲奧斯現時周薪達20萬鎊(約195萬港元)，奧林比亞高斯財力有限，只能負擔5萬鎊周薪，如果曼聯要成功外借安東尼畀奧林比亞高斯，相信需要承擔其中15萬鎊周薪，並未能慳到太多支出。