奧莫獲准臨時註冊　可出戰西超盃決賽

巴塞隆拿爭取為中場丹尼爾奧莫、前鋒保羅域陀註冊一事，峰迴路轉，會方經過向西班牙體育高級理事會(CSD)提出緊急臨時措施申請後，獲批准可為呢兩位球員臨時註冊，意味佢哋可以參加下周一(13日)凌晨西超盃決賽。

巴塞隆拿因為財政唔達標，丹尼爾奧莫、保羅域陀今季臨時註冊資格上月31日屆滿後，唔可以再註冊為西甲球員。巴塞方面早前曾向法院提出上訴，但被駁回，近日向CSD提出緊急申請，提交多達52頁上訴文件及60多份相關資料，最終獲批准可以為呢2位球員臨時註冊，但消息人士指有效期只得3個月。

巴塞隆拿周四(9日)凌晨西超盃4強擊敗畢爾包，丹尼爾奧莫同保羅域陀一齊坐觀眾席睇波，會長拉波塔特別同2人擁抱，並痛罵西班牙足總及西甲賽會做事唔光彩。西甲賽會發表聲明，指會研究上訴，睇來事件仲未結束。