史浩克04唔信邪　簽「膠龍」卡利奧斯

前利物浦門將卡利奧斯去年夏天離開紐卡素後，一直未搵到班落，據報佢將會加盟德乙史浩克04，簽約半年。

卡利奧斯於2018年歐聯決賽連續犯低級失誤，連累利物浦1比3輸畀皇馬，痛失歐聯寶座，自此呢位德國籍門將被標籤為「膠龍」，其職業生涯亦幾近被摧毀。

卡利奧斯之後轉戰比錫達斯、柏林聯及紐卡素，都無甚出場機會，對上一次上陣已經係去年2月為紐卡素上陣對阿仙奴，結果輸1比4。

年屆31歲嘅卡利奧斯仍未掛靴，現時身價為80萬歐元(約640萬港元)，喺佢堅持之下，終於獲史浩克04開出半年合約，嚟緊德乙可以見到佢。