英超球星涉嫌偷拍性愛片段　被拘捕盤問6小時

英超爆出性醜聞，根據英國《太陽報》報道，1位效力英超球會嘅國腳級球星，因為涉嫌同女伴上床期間，偷拍性愛片段，被英國警方拘捕，並盤問長達6小時，其後獲得釋放，預料會繼續為所屬球隊出戰周末英足盃第3圈賽事。

據悉該名球員喺訓練基地，正在進行操練期間，執法人員進入球場，帶走佢接受調查，同時拎走兩部涉嫌用來拍片嘅手機。消息人士話：「當兩名身穿制服嘅人員行入訓練場時，球員都以為係惡作劇，之後感到驚訝，完全唔知發生咩事。」

呢位球員於當地時間早上11點被拘捕，並接受盤問6小時，最後因為證據不足被釋放，基於私隱原因，英國警方只係透露該名球員大約20幾歲，涉及偷拍行為，但證據不足，唔會採取進一步行動。

事件起因係呢位球員同女伴上床期間，要求拍片，但女方拒絕之後，佢仍然偷拍，事後更將片段發送畀對方，引起女伴不滿，認為自己受冒犯，決定報警求助。呢位球員獲釋後，已返回球隊操練，並未受任何處罰，相信將會參加周末英足盃比賽。