利華古遜閃電戰摧毀多蒙特　追貼拜仁至1分距離

周六(11日)凌晨德甲歇冬後重開，上季冠軍利華古遜發動「閃電戰」，開賽19分鐘已經攻入3球，最終作客以3比2擊敗多蒙特，取得聯賽6連勝，僅落後踢少1場嘅榜首拜仁慕尼黑1分。

利華古遜今仗反客為主，前場逼搶成功，最後由尼敦迪拿射入世界波打開紀錄，當時只係開賽24秒。利華古遜得勢不饒人，軒卡派爾左路快放傳中，柏德列舒希克射成2比0。雖然多蒙特好快靠比諾傑坦斯入波追番1球，但柏德列舒希克19分鐘再建一功，為利華古遜領先3比1。

多蒙特之後創造唔少入波機會，但卻欠運，古拉斯、卡廉艾迪耶美嘅射門都被演出神勇嘅門將哈迪基撲出，卡廉艾迪耶美仲有1次射門中楣彈出。戰至79分鐘，多蒙特獲得12碼，古拉斯主射入網追至2比3，但為時已晚，自2022年2月之後首次不敵利華古遜。