科木爆冷逼和拉素　法比仔心雄搶購曼聯左閘

周六(11日)凌晨意甲爆出冷門，護級球隊科木作客逼和第4位勁旅拉素1比1，近期頻頻搶分得手，主帥法比加斯心雄，計劃今個月增兵，包括想收購曼聯左後衞杜維爾馬拉西亞，提升護級本錢。

科木今仗踢法主動，開賽5分鐘已經創造2次入波黃金機會，包括尼高柏斯半單刀射斜出界，中堅馬克甘夫接應罰球迎頂中楣彈出。拉素避過一劫，果然有後福，踢到34分鐘由保拿爾迪亞射入打開紀錄。

不過，拉素中場盧姆泰查奧拿喺58分鐘「兩黃變一紅」被逐，令科木佔上風，由柏德列古度尼頂入扳平1比1。今季新升班嘅科木近6場聯賽取得2勝3和1負，而且該敗仗係不敵勁旅國際米蘭，演出有明顯進步。

由於科木僅領先尾三萊切2分，仍深受降班威脅，教練法比加斯計劃增兵，據悉已經斟掂西乙球隊薩拉戈薩前鋒艾雲阿桑，雙方即將簽約。與此同時，法比仔仲想收購曼聯左閘杜維爾馬拉西亞，呢位25歲荷蘭國腳近年經常受傷，復出後被領隊魯賓艾摩廉棄用，紅魔鬼好大機會出售佢。