雲尼斯奧斯學「麥總」做班主　計劃收購葡甲球會

皇馬翼鋒雲尼斯奧斯祖利亞當選2024年世界足球先生，事業創高峰，呢位24歲巴西國腳並唔滿足於踢波，更加想仿傚隊友基利安麥巴比，希望成為班主，根據《ESPN》爆料，「小雲」計劃收購一間葡甲球會，擴大自己事業版圖。

雲尼斯奧斯祖利亞喺球場以外，有唔少搞作，同多位美國NBA籃球員及NFL美式足球員建立密切關係，亦喺巴西創立一間基金會，作為慈善用途回饋社會。《ESPN》引述消息人士指「小雲」又有新主意，希望收購一間葡甲球會，令事業更加多元化，並為將來退役鋪路，現時葡甲有18間球會，「小雲」仍然未決定買邊一間。

事實上，以往有唔少球星收購球會過班主癮，最具代表性一定係碧咸入股美職豪門國際邁亞密，「大哨」朗拿度收購西甲球會華拉度列，基利安麥巴比上年7月買入法乙球會卡昂，無獨有偶上述3位巨星都踢過皇馬，雲尼斯奧斯祖利亞似乎想同佢哋睇齊。