約基利斯今夏離開士砵亭　要求降低解約金

士砵亭瑞典神鋒約基利斯向會方表明，今個冬窗唔轉會，但夏天將會離隊，轉投一間大球會，並要求會方將解約金由1億歐元降低至7,500萬歐元(約8億至6億港元)。

葡萄牙傳媒報道，約基利斯今季表現出色，上陣29場交出31球5次助攻，吸引歐洲各豪門關注，其中兩個月前由士砵亭過檔曼聯執教嘅魯賓艾摩廉，最有機會帶呢位射手轉投曼聯。

約基利斯已通知士砵亭，今個冬窗無意離隊，會為球隊踢完今個球季，不過今個夏天就會離開，由於其合約至2028年6月，假如離隊必須支付轉會費，而士砵亭為約基利斯定下解約金為1億歐元。

約基利斯希望，士砵亭今夏能將解約金降低至7,500萬歐元，方便佢轉會，而約基利斯在《轉會市場》身價同樣是7,500萬歐元，據報雙方將會達成協議。