自己閂後門　安東尼控告阿積士

安東尼馬菲奧斯因為表現唔理想，曼聯之旅走到盡頭，今個冬窗將被出售，不過重返阿積士就唔使旨意，因為安東尼已經自己閂後門，早前控告阿積士曾向佢扣減薪金，為少少錢同母會對薄公堂。

事件起因在2022年8月，曼聯時任主帥坦哈格想買佢，向阿積士提出收購，在討價還價期間，安東尼罷操罷賽抗議，認為阿積士阻佢轉會，並缺席荷甲對鹿特丹斯巴達賽事，結果遭受阿積士3次罰款，相關罰款在波糧中扣除。

後來安東尼轉投曼聯，離開阿積士，但安東尼死咬唔放，堅持要阿積士清還被扣薪金，雙方糾紛持續2年，安東尼大約半年前向法庭提告，控告阿積士，聽證會於上周舉行。

安東尼在曼聯周薪高達20萬鎊，遠超阿積士嘅人工，而且阿積士係佢踏足歐洲嘅第1支球隊，估唔到安東尼咁樣對待母會。