曼城換血狂掃3新兵　馬莫殊同意加盟

飽受傷兵問題困擾嘅曼城，今季陷入罕見低谷，為下半季急起直追，冬季轉會窗非常積極買人。據報曼城即將完成3單交易，包括4,000萬歐元收購20歲中堅卡胡辛洛夫，令佢成為首個進軍英超嘅烏茲別克球員；法蘭克福前鋒馬莫殊據報亦已同意加盟，轉會費高達8,000萬歐元。

轉會權威Fabrizio Romano報道，曼城已同朗斯達成4,000萬歐元外加獎金條件，收購烏茲別克中堅卡胡辛洛夫，日內就會進行體測，完成後會簽約至2029年。除卡胡辛洛夫之外，彭美拉斯嘅19歲中堅域陀利爾斯，據報亦將以4,000萬歐元轉會費加盟曼城，「藍月亮」視佢為長遠投資。

最令曼城球迷興奮嘅消息，相信係法蘭克福前鋒馬莫殊答應轉會，Romano證實曼城同法蘭克福以及馬莫殊都傾掂數，將會正式提出開價，預料今個星期可以落實。呢位埃及前鋒周六(11日)仍代表法蘭克福披甲，一箭定江山助球隊1比0贏聖保利，哥迪奧拿視佢為代替季前離隊嘅祖利安艾華利斯最佳人選。