哈利卡尼一箭定江山　拜仁鎖定「半季冠軍」

周日(12日)凌晨德甲賽事，拜仁慕尼黑作客1比0擊敗慕遜加柏，提前鎖定成為德甲「半季冠軍」。拜仁過去曾經26次成為「半季冠軍」，其中23次成功喺季尾封王，絕對係爭冠好兆頭！

拜仁今場控制大局，不過受制於客隊嚴密防守，遲遲搵唔到入波方法，直到67分鐘米高奧利斯禁區內博到12碼，哈利卡尼操刀射入全場唯一入波，助拜仁小勝1比0，依家領先次席利華古遜4分。

拜仁教練高柏尼賽後表示：「今場係歇冬後第1場，作客特別難踢，但以我哋今場製造嘅機會，應該要入2至3球，但係做唔到。我滿意球員嘅鬥志同態度，尤其最後10分鐘保持冷靜，順利贏波。」

哈利卡尼再入波後，以15個入球壓倒馬莫殊(14球)排射手榜榜首，佢話：「我贏過神射手同最佳球員呢啲個人殊榮，但我唔會滿足，每一季都以捧盃為目標。」