謝德謙：阿仙奴對曼聯等睇加時戰

英足盃爆發仙魔戰，由阿仙奴主場迎戰曼聯，累計捧走英足盃次數最多球隊嘅兵工廠，與衞冕嘅曼聯交鋒，往往都話題十足，加上英足盃賽場雙方作戰心態大有不同，今場必定鬥得難分難解。

阿仙奴最近兩場比賽都無法取勝，包括聯賽作客1比1打和白禮頓，以及英聯盃首回合以0比2不敵紐卡素，主帥阿迪達賽後批評比賽用球係球隊輸波原因之一，相信阿迪達近期飽受不少壓力。兵工廠今場面對宿敵紅魔鬼，相信前線繼續倚重夏維斯、李安度杜沙特及加比爾馬天尼利三人進攻組合，務求重溫上月聯賽交手以2比0擊敗紅魔嘅好夢。

曼聯上周聯賽反彈以2比2打和利物浦，相信令不少球迷跌眼鏡，要不是哈利馬古尼完場前錯失黃金機會，有可能擊敗對手。主帥魯賓艾摩廉深知球隊今季目標必定放喺盃賽身上，今場必定落足柯打，叫一眾紅魔鬼保持上仗佳態。新星阿密特迪亞路剛續約加薪，相信今場必定委以重任。艾摩廉必定提醒紅魔鬼，今場做好死球防守，相信比賽形勢大有機會拉鋸，甚至有機會加時作賽。