迪馬利亞神助攻　賓菲加奪葡聯盃冠軍

周日(12日)凌晨葡聯盃決賽，士砵亭大戰賓菲加，雙方2位球星大鬥法，賓菲加36歲老將迪馬利亞貢獻助攻，士砵亭神鋒約基利斯射入1球，打和1比1，需要互射12碼分勝負，賓菲加球員7射全中，贏7比6奪得冠軍。

兩隊實力旗鼓相當，葡超第3位嘅賓菲加開賽初段踢法比較主動，並於29分鐘打開紀錄，迪馬利亞斜傳畀左路嘅舒積達路，呢位20歲挪威國腳盤球入中路射入。賓菲加跟住仲有前鋒柏夫列迪斯頭槌攻門，僅貼柱出界。

葡超榜首士砵亭唔使輸多1球，踢到43分鐘獲得12碼，約基利斯主射入網扳平1比1，最終需要互射12碼分勝負。約基利斯、迪馬利亞分別率先主射入網，兩隊首5輪都入晒，進入突然死亡階段，去到第7輪，賓菲加中場費羅倫天奴射入，士砵亭翼鋒法蘭斯高查卡奧射失，將冠軍拱手讓人，賓菲加相隔9年再次捧葡聯盃冠軍。