比比鹹魚翻生！搭上AV女星重新做人

科特迪瓦前鋒尼高拉斯比比，2022年挾住「英超水貨」之名離開阿仙奴，今季轉戰西甲喺維拉利爾表現獲好評，早前更公開同著名AV女星Teanna Trump嘅戀情，據報兩人打得火熱，比比事業同愛情都得到重生。

29歲嘅比比上年離開特拉布宗，自由身簽約維拉利爾，季初表現出色備受重用，11場聯賽有1入波同2助攻，可惜自上年11月開始因傷缺陣，不過佢養傷期間生活依然燦爛，新年嗰陣更公開同Teanna Trump戀情！

Teanna Trump係已引退嘅著名成人電影女星，11年前已「下海」拍AV，IG有超過140萬粉絲。而比比喺2017年同法國網紅Fanny B結婚，上年被踢爆兩人已經離婚，估唔到比比原來已經搵到第二春。

據報佢已由美國飛去西班牙同比比一齊住，早前亦唔避忌着埋維拉利爾波衫出現，甚至喺Snapchat公開同比比兩個仔一齊「親子樂」嘅影片，兩人愛得火熱。消息人士話：「Teanna對足球愈嚟愈有興趣，甚至比比冇份踢嘅波佢都會睇，拍拖之後佢哋都唔同晒！」