曼聯被球證打壓照贏　官方霸氣回應：正義必勝

曼聯近年經常成為誤判受害者，英足盃作客阿仙奴再成為幾次爭議判決嘅「苦主」，被罰12碼又食紅牌，搞到一眾球員都躁晒，好在最後都排除萬難晉級，曼聯官方賽後更喺社交平台X霸氣宣稱：「正義必勝」！

英足盃第3圈並冇VAR系統，球證Andrew Madley就成為主角，上半場般奴費南迪斯被加比爾捷西斯回防鏟到鞋都甩埋，但Madley未有吹罰，嬲到「般費」掟鞋發洩，結果反而被罰黃牌。

61分鐘達洛治被兩黃一紅趕出場後，70分鐘出現最爭議一幕，夏維斯同哈利馬古尼輕微碰撞下跌低，Madley直指12碼，曼聯球員不滿判決，一度引起雙方球員推撞，最終馬田奧迪加特操刀被救出。

最後互射12碼階段，夏維斯射門被撲出後，曼聯官方社交平台X即發文「正義必勝」，並且將呢個帖文置頂。曼聯名宿里奧費迪南亦抽水：「又一場奮勇嘅演出，我睇到球員團結一致戰鬥嘅決心......個球證應該好傷心。」