譚禾夫同熱刺鬥到加時 「渠王」做最佳球員
英足盃第3圈話題之戰，只屬半職業嘅非聯賽球隊譚禾夫主場對英超名牌熱刺，兩隊規模同實力差天共地，不過譚禾夫就踢出超水準，90分鐘同熱刺打成平手，去到加時先至連失3球輸0比3，雖敗猶榮。
雖然實力懸殊，不過熱刺今場都畀足面，班倫莊臣、占士麥迪臣、迪姆華拿等主力悉數擔正，但8成控球率未能轉化做入球，法定時間悶和0比0。隨住蘇蘭基、孫興民、古路施夫斯基都後備上陣，熱刺喺101分鐘終於靠對手擺烏龍領先，打開缺口之後，古路施夫斯基同班倫莊臣再入2球，最後大勝3比0晉級。
譚禾夫只係半職業球會，陣中球員多數都有正職，好似中堅賀連斯本身就係渠務工人，今場佢喺後防一夫當關，更有一幕精彩「施丹轉身」破解熱刺逼搶，賽後獲選為今場最佳球員，夠佢講足一世！