遠藤航樂意「轉型」中堅：幫到手就好！

利物浦今季大爆發，不過日本國腳遠藤航就成為大後備，今季只有15次上陣，當中4場正選全部都嚟自本土盃賽，而且仲要客串中堅。勢估唔到遠藤航踢中堅表現一樣出色，傳聞今個月可能被賣走嘅佢，表原樂意向中堅位置發展，最緊要係幫到球隊，頗具大將之風！

遠藤航嘅防中位置，今季已被賴恩格雲貝治霸佔，依家只能趁盃賽輪換先有機會上陣，上場英足盃對阿克寧頓，遠藤航就客串踢中堅，呢位31歲老將表示：「其實我喺18至25歲嗰陣都踢過後衞，無論踢防中同中堅都冇問題，我只需要盡力去做。我冇同施洛討論過踢咩位，佢覺得我踢中堅好適合佢套戰術，所以我希望之後會有更多機會，最重要係幫到球隊。」

由於上陣機會唔多，一直有傳遠藤航可能會喺冬季轉會窗被賣走，狼隊、葉士域治、些路迪同AC米蘭都被指有意提出收購，不過利物浦目前仍然喺英聯盃、英足盃角逐，而且祖高美斯最近又受傷，遠藤航下半季仍然會大派用場。