梅迪歷禁藥真相曝光　車路士打定輸數即買人

烏克蘭國腳梅迪歷上月被驗出曾服用禁藥，被英超賽會停賽，目前仍然等候「B樣本」化驗結果先決定刑期。據烏克蘭媒體透露，令梅迪歷藥檢失敗嘅元凶，可能係烏克蘭國家隊嘅「幹細胞治療」，消息指車路士已打定輸數，計劃簽新翼鋒頂替。

烏克蘭記者布巴斯爆料，梅迪歷喺代表國家隊比賽期間，曾為膝頭傷患進行「幹細胞治療」，並且多次進行注射，懷疑係驗出禁藥米曲胼嘅原因。據報梅迪歷嘅尿液「B樣本」化驗結果會喺今個月內完成，如果仍然係陽性，梅迪歷將面臨長達4年嘅停賽刑期。

報道指車路士對梅迪歷「甩身」機會打定輸數，據報有意收購拉科魯尼亞翼鋒耶利美靴南迪斯，呢位22歲翼鋒今季喺西乙上陣18場，有8個入波同3次助攻，合約內有2,000萬歐元買斷條款，車路士出手嘅話唔難成事。