退而求其次　曼聯斟約基利斯個後備

曼聯想簽士砵亭神鋒約基利斯路人皆知，問題係該球員解約金高達1億歐元(約8億港元)，就算肯減價都要7,500萬歐元，相當乸脷，據報曼聯退而求其次，睇中士砵亭19歲丹麥前鋒干拉特哈達，亦係約基利斯嘅後備，轉會費頂盡3,500萬歐元(約2.8億港元)。

干拉特哈達今季先加盟士砵亭，身價1,900萬歐元，擔任約基利斯後備，至今上陣30場，交出9球6助攻，魯賓艾摩廉帶咗佢幾個月，就畀曼聯挖角過檔英超，但同佢都算有一段師徒緣。

葡萄牙傳媒報道，曼聯最終目標係收購約基利斯，不過收購行動最快要到今年夏天先會實行，至於今個冬窗，就可能先向干拉特哈達埋手，而且曼聯本身已經有海倫，再簽入呢位丹麥U21，曼聯鋒線將出現丹麥前鋒組合。