烏加迪「鐵頭功」惹禍　面臨停賽3場

曼聯上場英足盃第3圈憑互射12碼淘汰阿仙奴，出現唔少爭議性場面，並且餘波未了，紅魔鬼中場曼紐爾烏加迪用頭頂撞對手夏維斯，當時球證馬特利走漏眼，但根據英國《鏡報》爆料，英足總可能對呢位23歲烏拉圭國腳秋後算帳，判罰佢停賽3場。

該場踢到70分鐘，曼聯中堅哈利馬古尼喺禁區內侵犯夏維斯，被判罰12碼，引起雙方球員衝突，曼紐爾烏加迪不滿夏維斯「插水」，爭吵期間一時情緒失控，用頭頂向呢位德國國腳面部。

由於球證馬特利睇唔到，加上英足盃第3圈不設VAR，曼紐爾烏加迪並冇受處罰。英國《鏡報》指呢位防守中場頭頂對手屬於暴力行為，英足總可能根據比賽片段，對佢秋後算帳，判罰佢停賽3場。曼聯未來3場本土賽事都係英超，包括主場對修咸頓、白禮頓、作客對富咸。

曼紐爾烏加迪喺社交網上載自己同球證爭論照片話：「我哋有波在腳時係1場比賽，冇波在腳時係1場戰鬥，必須保持呢種狀態。」似乎認為自己「暴力」行為冇問題。