基華5.6億入「門」　勢成法甲史上最貴冬季新兵

今個月轉會市場將出現巨額交易，根據「轉會權威」記者羅曼諾(Fabrizio Romano)爆料，巴黎聖日耳門(PSG)已經同拿玻里達成協議，將斥資7,000萬歐元(約5.6億港元)收購呢支意甲勁旅嘅翼鋒基華拉斯基利亞，等交易落實後，呢位23歲格魯吉亞國腳就會成為法甲史上冬季轉會市場最貴新兵。

基華拉斯基利亞早前拒絕續約，並要求立即離隊，拿玻里惟有將佢掛牌以7,000萬歐元出售，引起巴黎聖日耳門、曼聯、利物浦等多間大球會興趣，當中以PSG最爽手，並冇講價，直接滿足拿玻里嘅轉會費要求，同時向基華拉斯基利亞開出5年合約，估計周薪達16萬至20萬歐元，係佢現時人工嘅4至5倍，預料短期內就會正式完成交易。

基華拉斯基利亞至今為拿玻里上陣107場入30球，並協助球隊奪得2022/23年球季意甲冠軍，該季佢喺聯賽入12球及10次助攻。基華拉斯基利亞今季聯賽17次上陣亦有5球進帳及3次助攻，PSG希望用佢填補基利安麥巴比離隊後嘅位置。