C朗將減薪續約1年　留隊踢到41歲

效力沙特阿拉伯豪門艾納斯嘅葡萄牙巨星C朗將於今夏約滿，早前傳出續約問題懸而未決，根據沙特傳媒最新爆料，呢位射手已經同球會達成協議，將續約1年至2026年6月底，意味佢起碼會踢到41歲，但新合約年薪由現時2億歐元(約16億港元)減至1.83億歐元(約14.6億港元)。

C朗將於2月5號40歲生日，佢仍然未有退役打算，並希望為葡萄牙出戰2026年世界盃決賽周，所以決定同艾納斯續約1年，保持狀態出戰呢項國際大賽。事實上，C朗曾經表示希望留隊至掛靴，今次續約屬於順理成章嘅事。

C朗效力艾納斯2年以來，總共上陣89場射入81球及19次助攻，換言之已創造100個入波，仍然保持高水平發揮。不過，呢位巨星仍未為艾納斯奪得任何正式賽事冠軍，一直為人詬病，佢續約後最大目標一定係為球隊捧盃。

此外，C朗職業生涯已入917球，留隊另一個目標係爭取射入第1000球。